Kela

Kela lij õlmstâttam vaalljstõõǥǥ nuõrtsääʹmǩiõllsaž ooccâmlomaakkid. Lomaakk liâ liâđǥlânji tiuddeemnalla, da töid vuäitt tååimted Kelaaʹje OmaKela meâlddõssân leʹbe pååʹštin.

Kela lij õlmstâttam 30 jeeʹresnallšem ooccâmlomakk nuõrttsääʹmǩiõlin. Nuõrttsääʹmǩiõllsaž äʹššneǩ vuäitt ååʹn ooccâd takainallšem ouddõõzzid jiijjâsǩiõllsaž lomaakkin. Kela lij ääiʹjab õlmstâttam seämma lomaakkid še tâʹvv- da aanarsääʹmǩiõʹlle.

Sääʹmǩiõllsaž lomaakk liâ liâđǥlânji tiuddeemnalla åårrai pdf-lomaakk. Pdf-lomaakki tiuddeem vääras teâttmašinain taarbšet Adobe Reader -prograamm da juõʹǩǩ sääʹmǩiõl meâldlaž puällpååʹrd ohjjeei programm. Lomaakk vuäitt haaʹleen priʹnttjed da tiuddeed še ǩiõđi.

Sääʹmǩiõllsaž ooccmõõžžid da jeeʹres äʹššǩiiʹrjid vuäitt tååimted Kelaaʹje OmaKela pääiʹǩ meâlddõssân leʹbe pååʹštin addrõʹsse Kela, PL 10, 00056 KELA.

Sääʹmǩiõllsaž ooccmõõžž Kelaaʹje kuâđđam äʹššneǩ vuäǯǯ tuʹmmstõõǥǥ nuʹt lääʹddǩiõʹlle ǥu sääʹmǩiõʹlle.

Kelast vuäǯǯ še persoonlaž vuäʹpstõõzz nuõrttsääʹmǩiõʹlle

Kela taʹrjjad nuõrtsääʹmǩiõllsaž äʹššniiʹǩǩid še jiijjâsǩiõllsaž persoonlaž kääzzkõõzz. Kela nuõrttsääʹmǩiõllsaž teʹlfon- da ougglõskääzzkõs lij äävai vu–pi čiâss 9–11. Sääʹmǩiõllsaž teʹlfonkääzzkõʹsse vuäitt kueʹđđed õhttvuõđraukkmõõžž addrõʹsse saame@kela.fi.

Sääʹmǩiõllsaž kääzzkõsäʹšštobddi vuäitt väʹldded vuâstta še njäälmlaž ooccmõõžžid äʹššneeʹǩǩ vueʹjj mieʹldd. Äʹššneeʹǩǩest ij taarbâž tobddâd Kela ouddõõzzi sääʹmǩiõllsaž teermid, što son vuäitt håiddad Kela-aaʹššeez jiijjâs ǩiõlin.

Jõs äʹššneǩ ij mõõn-ne määinast vueiʹt leʹbe haaʹled håiddad jiõčč jiijjâs Kela-aaʹššeez, son vuäitt haaʹleen väʹlddeed nuuʹbb oummu håiddad aaʹššeez tååimteeʹl Kelaaʹje väʹlddǩeeʹrj. Kela õlmstõõʹtti õiʹdde ođđ vuäʹpstõõzz väʹlddǩeeʹrj tiuddeem vääras. Vuäʹpstõs lij vuäǯǯamnalla še nuõrttsääʹmǩiõʹlle.

Sääʹmǩiõllsaž kääzzkõõzz vuâđđâʹvve sääʹm ǩiõll-läkka

Kela taʹrjjad neʹttseeidain teâđ ouddõõzzin pukin kooumin Lääʹddjânnmest mainstem sääʹmǩiõlin: tâʹvv-, aanar- da nuõrttsääʹmǩiõʹlle. Še jeäʹnnvuõttpaʹǩǩõõzz vuõssǩeeʹrj lij vuäittam eeʹjj 2022 aalǥâst vuäǯǯad sääʹmǩiõllsiʹžžen. Lââʹssen OmaKela-äʹššeemkääzzkõõzz sääʹmǩiõllsaž tååimid viiǥǥât ooudâs pueʹrmõõzz poodd.

Kela sääʹmǩiõllsaž kääzzkõõzz vuâđđâʹvve sääʹm ǩiõll-läkka. Ooudâsviiǥǥeeʹl sääʹmǩiõllsaž kääzzkõõzzid da saakkeem ǩiččlõõđât ainsmâʹtted, što sääʹmǩiõllsaž äʹššniiʹǩǩi Ǩiõllaž da sosiaalʼlaž vuõiggâdvuõđ teâuddjâʹvve Kela kääzzkõõzzin.

Looǥǥ lââʹzz